當年今日

黃福榮義舉賴市民支持

蘋果日報 2002/01/14 00:00


現今交通發達,打破咗地域界限,一程飛機已經可以貫通南北全球,慳水慳力。不過,大使就真係估唔到,𠵱家竟然重有人會選擇用最原始嘅方法,唔搭車、唔搭船、唔搭飛機,靠自己雙腳行路上北京,講緊嘅咪係為血癌病人籌款嘅奇人黃福榮囉!
大使之所以用「奇人」兩個字去形容黃福榮大哥,係因為黃兄嘅超人勇氣同毅力,的確叫人嘖嘖稱奇。唔好話乜,你叫大使行三日都頂唔順啦,𠵱家講緊嘅係要行三個月,二千七百公里喎,相信唔係咁多人可以做到。

尚需市民響應資助
黃福榮由元旦日開步至今,已經足足行咗十四日,𠵱家正朝衡陽、長沙進發。大使知道,呢兩個星期以嚟,三十七歲嘅黃兄都行得幾辛苦,雙腳起晒水泡,但憑住佢「開弓沒有回頭箭」嘅信念,加上沿途唔少市民熱烈支持,疲態畢露嘅黃兄依然咬緊牙關繼續上路,對於佢呢份不屈不撓嘅精神,大使真係要向佢致敬,亦衷心希望黃兄可以順利完成呢項義舉。
事實上,黃兄除咗需要大家精神上嘅支持之外,亦好需要廣大市民金錢上嘅資助,否則佢嘅辛勞都係枉然,亦唔能夠造福香港骨髓捐贈基金同中國紅十字會造血幹細胞資料庫。
當然,市民更可以身體力行,去到中區紅十字會捐血站登記同驗血,加入骨髓捐贈者行列,用實際行動支持呢班血癌病人。查詢電話:28190766。
香港骨髓捐贈基金──捐款編號:C0400
中國紅十字會造血幹細胞資料庫──捐款編號:C0401

暖流熱線
電話:29908688
傳真:23702192
電郵:[email protected]
網址: http://www.charity.atnext.com