林子瑄、戴夢夢和鄧穎芝昨日參與《饑饉三十》時，蹲下玩遊戲不慎春光乍洩，林子瑄胸前春色無邊，戴夢夢則發生露點疑雲，身為前輩的楊千嬅即時教路，女藝人參加戶外活動時，要黐膠紙防走光，便可玩得更安心。

由商台和世界宣明會主辦的《饑饉三十》前晚和昨日在香港仔運動場舉行，出席的藝人包括楊千嬅、古巨基、薛凱琪、梁漢文、黃貫中、何韻詩、房祖名、官恩娜、戴夢夢、林子瑄、鄧穎芝、劉浩龍等，大部份藝人都穿上大會T恤，部份女藝人則將T恤加以剪裁改裝。
歌手們要在平衡木上運水，又要蹲下玩遊戲，雖然在旁的DJ不時提醒女藝人小心走光，但林子瑄蹲下時仍不慎露出豐滿上圍和黑色胸圍，戴夢夢和鄧穎芝亦露bra，夢夢更露出內褲邊，還懷疑露點。

Toby掩護鄧穎芝
事後戴夢夢接受訪問時說：「我喺平衡木度失平衡，係因為我感冒，今朝食藥時食多咗一粒安眠藥，唔知係咪因為咁而暈陀陀，而天氣好熱，所以件T恤嘅領口剪大咗少少。」當夢夢被告知懷疑露點後，即緊張地說：「係咪真㗎，咁點算？點都俾人當儍仔，我心情好down，以前人哋走光之後會點㗎？」
最安全的是沒有將T恤改裝的梁靖琪（Toby），她甫見鄧穎芝走光，即用手肘掩護對方，官恩娜則在領口貼上膠紙防走光。
而楊千嬅身為「聯合國基金會大使」，故沒有穿上大會T恤，以免身份尷尬，當千嬅得知眾師妹走光，即教路說：「女藝人應該做好打底措施，可能佢哋少參與戶外活動嘅經驗，玩到忘形真係唔知會走光，最好貼膠紙啦，咁就可以玩得放，我拍打鬥戲重會黐勞工膠布，可能我自己size唔起眼，所以穩陣啦！」

小儀跌傷送院
此外，DJ玩遊戲時，眾女DJ要企上男DJ的膊上，阮小儀和謝茜嘉均意外跌下，小儀跌傷手肘，謝茜嘉因向後跌受傷，由擔架抬上救護車。而梁漢文則餓到有氣無力，他說：「我冇偷食，所以好肚餓，頭先同小朋友跳舞時覺得有啲攰，要爭取時間休息吓。」
採訪：李珮洳、王連連　
攝影：陳慧安、何國豪