港股連跌5日後，昨日出現似樣少少嘅反彈，國企指數前日低試4434，觸及上月中低位，止跌，昨日彈勢強勁，單日升幅3.7%。禽流感事件若再無不利發展，少啲見乜乜人傳人嘅新聞，大市有機會再上番啲。
華能（902）收13.55元，升4.6%。呢件芬佬股，跌到咁上下就會有重盤求貨。有禽流感，都要用電。華能Call輪9918收38.5仙，升幅11.6%，7月到期，負溢價1.5%，槓桿率3.5倍，爆炸力稍弱，但勝在有負溢價着番少少數。另一件9913，6月到期，輪價2.175元，6.2倍槓桿率，爆炸力大啲，但要畀3.7%溢價。

大唐輪9401可博
北京大唐（991）收5.60元，冇升到，係3大國內同類股中唯一冇郁嘅電力股，遲早會跟番大隊上去，吼啲相關Call輪有機搵錢，對象係9401，7月到期，輪價77仙，溢價6.6%，槓桿率7.3倍。溢價稍高，但有槓桿率夠大補番數。
紅籌指數跑輸國企指數好多，中信泰富（267）跌0.7%，華創（291）企定，不妨趁低收集佢哋嘅Call輪。華創Call輪揀9131，7月到期，輪價1.11元，溢價7.7%，槓桿率9.2倍。中信Call輪揀9883，4月夠鐘，輪價57仙，溢價0.7%，槓桿率3.7倍。
章　盛