當年今日

蔭功太燥?甄曦太正?
馮仁昭四圍超:梁漢文挨美少女流鼻血

蘋果日報 2002/08/02 00:00


張達明、梁漢文、齊芷瑤、蔡安蕎同亞視「夏日陽光美少女」候選者之一嘅甄曦,最近拍咗一套新片《夏日冬蔭功》。眾演員早排去咗泰國拍外景,重因利乘便玩咗好多水上活動,好似水上電單車同沙灘排球。

泰國有豔遇
《夏日冬蔭功》劇情講述張達明同梁漢文因為被一間公司裁員,於是相約去泰國旅行散心,其間遇到齊芷瑤同甄曦,故事就係圍繞呢班年輕人嘅感情關係。
只見梁漢文依偎喺甄曦嘅膊頭上,佢唔知係咪情傾對方至走火入魔,挨住時竟然流鼻血,認真誇張。

尹光要子還父債
尹光噚日喺電視城參加遊戲節目《一觸即發》,佢老婆同囝囝都有到場,尹光話:「之前問過監製話可以父債子還,咪叫個仔嚟代我跌落個窿囉!」而《一觸即發》已經鐵定加長十集,到時可能會組織一啲父子檔或母女檔嚟參加,等多啲人可以嚟玩。
樋口明日嘉學跳舞出碟
樋口明日嘉噚日去尖沙嘴出席電影《玉女亞拉丁》嘅開鏡儀式,佢話為咗遲啲返日本出一隻唱片,近來學緊跳舞。樋口明日嘉早排去咗台灣拍一個杯麵廣告,重遇到地震,好彩冇受傷,佢重話拍廣告時NG咗好多次,臨走前個廣告商重送咗一大盒杯麵畀佢。

蔣怡西梅廣告夠健康
第一代「啤妹」、名模蔣怡之前以六位數字酬勞,接拍美國地捫西梅廣告。蔣怡形象一向以性感見稱,佢同周星馳拍生力清啤廣告時,就令人留下深刻印象,但佢今次接拍嘅美國地捫西梅廣告,就以健康嘅形象取勝。
拍攝當日,蔣怡以三點式泳衣上陣,配合產品嘅健康形象。而廣告商今次亦大灑過百萬嘅宣傳費,進行大型推廣活動,喺下個禮拜三會正式開始宣傳。

蒙嘉慧生日發錢寒
蒙嘉慧噚日喺無綫電視城出席《八月星辰》活動,蒙嘉慧話:「生日願望係身體健康,同埋搵多啲錢,前晚已經有fans送咗個生日蛋糕去電視城畀我,不過咁啱我唔喺廠,所以已經被人瓜分晒,總之好多謝嗰位fans啦。」
鄭秀文淡出娛樂圈
鄭秀文喺噚日播出嘅商台節目《茶煲裏的查篤撑》度話:「我諗藝人係我人生一個階段,而我嘅目標係去到三十歲打後,可以淡化,但咁唔代表退休。其實幾年前我已經計劃緊,不過冇一個落實嘅時間。」淡出後,鄭秀文希望去學畫畫,佢覺得畫畫可以減輕壓力。

李璐客串畫公仔
早前曾經同中文版《閣樓》雜誌拍過性感照片嘅女星李璐,估唔到都有啲藝術細胞。李璐趁得閒,最近就幫灣仔一間名為TheGroovyMule嘅酒吧畫外牆驢仔公仔標誌,而酒吧裏面嘅顏色佢都有份配搭。雖然係客串性質,但都畫得維肖維妙。

傳羅文病情有變
目前喺醫院留醫嘅羅文,噚日凌晨一度有傳佢嘅病情有變,籮記助手阿東噚日朝早約十時到醫院時話:「前晚點幾鐘有記者call我,問我呢件事,我覺得講出嚟嘅人好唔負責任,一個人好好哋,成日都講成咁,我唔係嬲,我只覺得天有眼,小心啲,惟恐天下不亂。」