馬會足智彩推出嘅「6寶半全場」，除咗第一期之外，第二、三期都有人中獎，搞到好似平淡咗啲。唔知係咪咁嘅原因，馬會今期開出嘅「6寶半全場」難度十分高，既有英超聯賽事，又有意甲聯賽事，重有埋首次出現嘅德甲聯賽事㖭！唔通馬會想博冇人中，以便下一期有「多寶獎」？
並唔係我求大俠吹水，今次「6寶半全場」所開出嘅比賽，真係好難估，好似意甲聯大戰羅馬對主場對祖雲達斯，就已經唔知點估，唔通要喺畫飛時填「F」？另外，首次出現嘅德甲聯，由前列嘅史特加作客包尾柏林哈林，牌面上就梗係史特加高晒，不過，柏林哈化其實人腳唔差，佢哋球員為護級可能會發揮小宇宙，一個唔覺意「反底」贏波都有之！

英足總查種族歧視般莫迪縮沙唔撐
富咸前鋒般莫迪早前話喺比賽時，畀愛華頓前鋒鄧肯費格遜用啲有種族歧視成份嘅說話鬧佢，英足總見事態嚴重，就即時展開調查。點知般莫迪喺呢個時候卻縮沙，話唔想搞大件事。如果般莫迪所講嘅嘢係真，冇理由唔撐到底，所以邊個講真話邊個講大話，明眼人一睇就睇到。