當年今日

  唐英年父子 誓不同機 - 李八方

蘋果日報 2003/08/25 00:00


呢排人人都話新上任嘅財政司司長唐英年腳頭好,噚日唐少首次以財爺身份外訪,就撞正香港掛三號風球,架機飛飛吓不時遇上氣流震吓震吓,都咪話唔驚,好在最後都安全抵達目的地福州。
起飛前八方問財爺,三號風球之下坐飛機驚唔驚?唐少好有信心咁話唔怕,因為現今科技好先進。不過八方就曾經聽聞,唐少同佢阿爸唐翔千有個協定,兩仔爺唔會坐埋同一架機,咁做嘅原因同英國皇室一樣:擔心有意外。今次連最近成日做「跟得夫人」嘅唐太郭妤淺都唔見出現,唔知係咪因為呢個原因呢?

非常合作任影唔嬲
今次唐英年係去福州參加當地嘅「香港周」活動,向內地推介香港嘅投資環境。同機嘅隨行記者梗係唔放過機會,想喺飛行途中訪問唐少。唐少做咗司長未及百日,正所謂「蜜月期」都未過,當然非常合作笑口噬噬任影唔嬲。不過飛行時間太短,只有個幾鐘,架飛機又屬於細型號,非常迫夾,喺氣流影響下,記者最終亦被迫放棄,好在唐少識做,噚晚到埗後十點幾都喺酒店答記者問題,今日又會喺連串活動間抽時間同香港傳媒茶敍。


傳真︰2623-9278
電郵︰[email protected]
empty
老竇:我哋冇咁蠢!
設計對白