馬主Ｆ趁馬季開鑼前最後一個周末，飛咗去關島享受陽光海灘，點知人算不如天算，飛機酒店一早卜咗，但上機前睇天氣報告，知道關島日日落雨，心裏為之一沉。

馬主Ｆ舊年復活節去過關島，印象甚好，但今次就麻麻矣。去年大陸航空直飛，四個半鐘頭就到，晚上十一時許上機，瞓醒就到，叫做舒服，但今年改為直航西班（塞班、Saipan）島，航程同樣四個半鐘頭，改為香港時間晚上九點三十分起飛，唔湯唔水，到咗西班，係凌晨二時，夾硬睜大隻眼落機，去轉機室，帶埋手提行李再接受「反恐安全檢查」（要除鞋），兜個圈，入番候機室，再排隊上原來班機，個人經一番滋擾，點瞓呢？半個鐘頭後，到達關島，搞過關手續、等行李，出到機場外，係當地時間早上六時半（快香港二小時），機場的士站一架的士都冇，天上烏雲密布，大雨將至，的士站一帶冇瓦遮頭，呆等二十分鐘，心裏愈嚟愈急，於是使出一招香港人慣用手法，推行李衝出馬路搵的士，好彩啱啱一架的士經過，立即上車去凱悅酒店，車門都未閂埋，就大雨滂沱。
入到凱悅酒店（HyattRegency），剛好早上七點，門口有bellboy、doorman，見有人客到，唔係趨前，竟然退後，唔見人影，馬主Ｆ畀完十五美元的士費（唔夠十分鐘車程，認真貴），惟有自己拉行李入酒店，checkin已經攰到唔識講嘢。接待員冷冷咁講：「每日checkin時間係下午三時，現在冇房，間間爆晒，你食早餐等吓先啦！」馬主Ｆ已經企喺度都瞓得着，點肯等到下午三時呀，一於死賴。都係冇房，死死氣食早餐，食到飽晒，睡意更濃，惟有埋單。走出去酒店lobby，見有大梳化，最啱二百五十磅肥佬一個人坐，於是坐落去，其後不省人事，俾人嗌醒上房之時，已經係早上十一點。