當年今日

701收料站:分析員齊唱好TCL

蘋果日報 2002/09/19 00:00


呢排國產手機有如百花盛花,間間生產商都鬥到八彩。
不過TCL國際(1070)就獲得一班外資大行繼續吹捧,話佢哋生意好好。至於早前爭到頭崩額裂嘅彩電市場,又話TCL頂得住,兼且業務有復甦迹象。
小初唔知班分析員係咪夾定,有咩理由一齊出報告唱好TCL咁巧合,重一齊話睇3元。家陣市況咁差,實在唔明點解佢哋咁神勇。
查實TCL近排股價真係好硬淨,一直在2元邊企穩,噚日恒指跌成二百幾點,佢都係平收2.20元,對捧場客算好有交代。但家陣市況咁差,要上車跟炒,小初就有啲猶疑,覺得多一事不如少一事。
另外,上次提過嘅401控股(401),真係50合1併股後,跟住再大折讓配股,集資唔夠1000萬元。
經紀陳話要留意新入局嘅上海幫動態,當佢哋完成股本重組就會有嘢睇。小初心諗,到時先算啦。
慕容小初