黃色巨鴨（Rubber Duck）噚日終於下海，去咗青衣對出海面試水。菲菲公司99.9%嘅女同事單係睇隻鴨鴨嘅泳照，一個二個已經忍唔住高叫：「好得意呀！真係好得意！」冷不防女同事Mag彈出一句：「其實吹脹隻膠鴨，有乜實際經濟效益？」呢一個令人掃興嘅問題，對一班原本懷住興奮心情嘅女人，有如一盤冷水照頭淋，然後一哄而散。
Mag提出嘅問題雖然掃興，但認真計數，巨鴨的確有利可圖，第一個受惠嘅一定係「叫鴨」來港嘅九龍倉（004）。鴨鴨下月2日，將會游去海運碼頭展出，到時海港城人流一定爆旺，墟冚程度相信直逼上年嘅多啦A夢展。至於海港城樓上嘅酒店，聽講亦將會推出鴨鴨主題餐，實行「有鴨駛盡隽」。
九倉旗下商場宣傳攻勢一向強勁，時代廣場嘅Lego展，同哥哥Leslie展一樣旺場。九倉股價年初至今升15.4%，唔單止係藍籌升幅磅季軍，仲冠絕藍籌地產股，吸金力咁強，跑贏同業實在有理。

Fifi
本欄逢周二、四刊出