咪睇迪西里呢位法國國家隊隊長個樣生得高大威猛，原來頭腦鬼死咁簡單，重抗拒唔到別人嘅誘惑，走去學人啪丸仔。
話說𠵱家踢梗車路士嘅迪西里，喺效力馬賽嗰陣時，當時嘅會長塔比喺對巴黎聖日耳門之前，醒咗啲不知明嘅藥丸畀佢，重話佢知如果要贏波，就一定會啪落肚。由於迪西里喺嗰刻有啲懷疑，於是就攞啲丸仔畀迪甘斯睇，點知迪甘斯一睇就話係禁藥，重叫佢千祈咪食。但係，喺塔比講兩講之後，迪西里就啪咗一兩粒落肚。
雖然迪西里話事後證明唔到佢食嘅係禁藥，但係佢咁樣攞自己嘅前途嚟教飛，我求大俠就覺得佢好蠢啫！老實講，係法國佬都知塔比係個大蠱惑，而迪西里佢重夠膽死聽佢點，你話係咪好司徒拔呢！你大個仔㗎啦，好自為知！

女觀眾遭冰球擊中喪命
十三呢個數字對有啲人嚟講原來真係不祥數字，十三歲嘅美國小妹施絲早幾日睇睇吓一場冰棍賽，竟然禍從天降，被球手所打嘅冰球飛埋嚟擊中，結果一命嗚呼，雖然話今次可能係職業冰棍賽歷來首次類似意外，賽會亦早喺球票底寫明可能有機會發生類似危險，但畢竟人命關天嘛，有關方面真係要諗計以防慘劇再發生，如果唔係就搵鬼睇嘞。

莫拉莉戰勝癌魔復出
重記唔記得上年戴雲寶同卡佩雅蒂兩位網壇阿姐級人馬曾經話要將勝利獻畀患白血病嘅好友莫拉莉，唔知係唔係佢哋感動到上主，呢位前溫布頓