我愛法拉利，亦愛陳法拉，但你話如果夾硬要我悠穎馳是旦擁有一樣嘅話（編按：唔好勉強喎！）我會揀「陳法拉利」，即係兩個都要，皆因香車美人，絕無衝突。
今年係法拉利60大壽之喜，咁高興，當然要搞吓慶祝，所以佢哋就搞咗個玩足5個月嘅環遊全球馬拉松活動。環遊車隊早喺1月30日就已經喺阿聯酋首都阿布扎比出發，途經沙地阿拉伯、科威特等中東地區，2月9日抵達咗中國，然後再去日本、南非及美洲、歐洲等地，而活動最後將會於6月23日喺意大利結束，而全球有成10,000名法拉利車主參與該次活動。
除咗搞活動，法拉利仲宣布會以612Scaglietti為藍本推出一部60周年紀念版，不過老實講，我悠穎馳一直都對612Scaglietti無好感，硬係覺得佢完全無晒法拉利嘅個性，根本就係Porsche＋Peugeot＋Audi嘅混合體，法拉利仲偏要揀佢做大壽禮物，真係……