陳法拉噚晚以性感透黑bra嘅造型喺金鐘出席活動，啱啱喺內蒙古拍戲返港嘅法拉，佢話今次行程好難忘：「嗰度係一個好寒冷嘅地方，凍到只得零下18度，喺戶外企一分鐘已冇晒感覺，我有帶暖包去，不過一出到戶外，暖包都凍埋，上返車嗰暖包先熱，所以冇用，就算着咗羽絨都冇用，啲風直接穿透，凍到不得了。」

唔知佢下次又會唔會再去咁凍地方拍攝，法拉話：「好彩今次大部份工作地方都係喺室內，仲有啲係喺城市入面，我哋偷咗一日去體驗蒙古包，去咗一個蒙古人屋企食飯，嗰個人有成6千畂地，好靚好靚，啲草係金黃色，見到好多馬、牛同羊，從來未見過嘅景象，不過自己好彩去咗幾日就適應咗天氣，將打底褲着晒上身，着咗3層，連眼睫毛都結埋冰，影close　up要掃走啲冰先拍。」

提到聖誕節，法拉就話買禮物返美國陪屋企人過：「好耐冇同佢哋一齊過聖誕，好期待媽咪聖誕大餐，今次可以留5日左右，美國嗰邊都好凍，會暱埋喺屋企，着晒聖誕睡衣就有氣氛，就唔出去凍。」提到外籍男友，法拉話佢已試過媽咪手勢，唔知男友有冇下廚畀佢媽咪呢？法拉話：「咁又冇，唔會咁樣毒害媽咪，佢唔識煮嘢食，媽咪好勁，一年365日都會煮嘢畀爹哋食，真係好勤力，我將來都希望好似媽咪咁叻，又煮飯，又要兼顧事業，又養大我，喺屋企做清潔，又有自己時間去學跳舞，佢個人生好balance，希望我好似佢咁。」

精選娛聞，喺晒《娛果》
http://fb.com/appledailyent