當年今日

呂中豪傑:星仔抵你冧掂女主播! - 呂晨

蘋果日報 2013/12/31 00:00


又一例證!球星都偏愛女主播!前曼聯中場朴智星(右),今年6月被南韓傳媒揭發秘戀SBS電視台美女主播金敏智(左),呢位南韓球星隨即大方承認戀情,近日仲宣佈同拍拖半年嘅女友開花結果,出年夏天將步入教堂!
唔好睇朴智星一對線眼又欠出眾外表,由大方承認戀情到公佈婚訊,抵佢娶得美人歸㗎!睇番佢哋戀情曝光、被傳媒偷拍到嘅雨中漫步照,平日木無表情望落cool爆嘅朴智星,拖住女友手仔撐傘時不時儍笑,二人仲坐喺湖邊長凳相依傾偈,只係睇相已經覺得自己似睇緊韓劇。唔單止呀,每次朴智星被記者問到戀情,都隔空向女方告白:「喺我眼中佢係最可愛嘅女人。」而作為職業足球員,去季陷入「入球荒」嘅朴智星仲話,就算入球,都唔及遇見女方咁幸福!
衷心希望呢段球星Ⅹ女主播嘅婚姻,可以打破球星離婚「魔咒」,白頭到老!文:呂晨
有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange