英國博彩公司偉德國際（VictorChandler）噚日高調開論壇，批評政府的賭博修訂條例冇用，並建議政府應盡快決定賭波合法化，同埋發牌畀國際性博彩機構在香港合法經營。
不過，無論間公司點鬧都好，政府同議員都好似唔係好理會，即使佢哋十日前邀請咗民政事務局班官員、所有行政會議成員和立法會議員出席論壇，但最後只有何秀蘭派咗一名助理旁聽。相反，八方喺現場見到唔少其他國際博彩公司的人，好似威廉希爾（WilliamHill）及易勝博（Easybets）兩間公司，都有派人坐足全場。
偉德國際重好有心思，委託公關公司向傳媒大派六合彩券，每人一張，永不落空，當然中唔中就睇彩數。呢個gimmick認真冇得彈，不過中六合彩真係話咁易咩，八方張彩券就只中一個號碼。
（圖）偉德國際高層噚日高調開論壇，但班高官同議員就一於冇面畀。


E-mail：[email protected]