容祖兒及梁漢文等前晚演出「愛思考真實力音樂會」，梁漢文透露日前到香港迪士尼遊玩時遇扒手，他的褲袋也被𠝹破，幸好梁漢文早將錢包以褲鏈綁着，方能力保不失！

容祖兒、梁漢文、衞蘭及關智斌等前晚在九龍灣會展演出「愛思考真實力音樂會」，梁漢文透露他日前與陳奕迅等好友遊香港迪士尼時，遇上扒手，幾乎被偷去錢包。

摸黑𠝹袋

梁漢文說：「我成日唔見銀包，所以不嬲都用條褲鏈箍住，點知排隊等玩遊戲時，嗰度好黑，我真係唔發現有乜嘢可疑人，但我個褲袋就俾人𠝹咗個L位，銀包跌咗出嚟，但好彩有褲鏈，所以偷唔到。」問他會否向迪士尼反映，他就說：「冇諗過喎，呢啲嘢度度都會發生嘅，不過都希望佢哋加強保安。始終佢哋咁大盛事，唔希望再發生喺其他遊客身上。」

負傷上場

此外，現場只見祖兒左手纏着繃帶，她表示日前拍新歌《好事多為》MV其間，在做出耍太極動作時不慎扭傷，翌日立即往看跌打。
祖兒說：「我連今朝出門口戴bra都冇力，沖涼又用單手，好痛呀！」她更表示連戴bra也要由母親代勞。提到韓國歌手Rain稍後來港開演唱會，祖兒表示因為要綵排將於十月底舉行的個唱，故無暇欣賞。她說：「我本來想去日本睇佢個演唱會，後來覺得睇DVD差唔多，所以冇去。」

拒絕隆胸

祖兒前晚身穿性感上衣演出，她笑言自己「冇嘢睇」，問她會否考慮隆胸？她說：「唔會，我睇過隆胸過程，好核突，又剪皮又塞嘢入去，毛管戙呀！𠵱家OK，或者等奇迹出現。」
採訪：駱華齡　攝影：林德雄