隔牆有耳:哈爾濱冰雪節關發展局事
去畀面派對 黃偉綸公費旅遊? - 李八方

蘋果日報 2019/01/04 00:00

隔牆有耳發展局局長黃偉綸哈爾濱國際冰雪節

發展局噚日公佈,局長黃偉綸今日北上,聯同香港工業總會代表團,出席哈爾濱國際冰雪節開幕式,不過發展局工作同冰雪節大纜扯唔埋,為乜黃局長千里迢迢去一趟呢?唔通香港冇乜緊要嘢做?定黃局長對哈爾濱風光景點好有興趣?

八方睇新聞稿,黃局長今抵哈爾濱,出席市領導宴請及文藝晚會,周六為一場香港與哈爾濱的青少年冰球賽主持開球禮,之後參觀哈爾濱國際雪雕藝術博覽會,同哈爾濱國際冰雪節開幕式,星期日返香港,睇呢幾項行程,似乎同發展局工作冇乜關係,至於點解係與香港工業總會同行,新聞稿都冇說明。

發展局新聞秘書回覆《蘋果》,話局長今次係應哈爾濱市政府邀請,代表特區政府出席哈爾濱國際冰雪節開幕禮及相關活動。至於此行開支總數包括機票、交通等金額就有待確定。有人私下向八方講,據知以往特區駐京辦都會派員出席冰雪節,今次主辦單位想「升格」請問責官員出席,政府就搵咗黃偉綸做代表咁話。
涂謹申︰應派更適合對口單位
不過咁講法,黃局長只係去個「畀面派對」,立法會議員涂謹申同八方講,佢唔會輕率質疑黃局長「公費旅遊」,但如果主辦方係邀請特區問責官員,政府係咪應該派一個比發展局更適合嘅對口單位做代表?舉例負責旅遊嘅商經局局長邱騰華,或者係涉及青年政策、體育嘅民政局局長劉江華?如果相關政策局冇代表,政府大可婉拒邀請,慳番筆錢。

李八方