當年今日

  馬丁輪椅上陣 - 李八方

蘋果日報 2006/10/13 00:00


馬丁有時風濕發作,行路會拐吓拐吓,或者攞支枴杖輔助吓,但噚日佢出席立法會特首答問大會時,喺門口竟然要坐上立法會嘅輪椅,唔通風濕嚴重到咁?原來馬丁今次係扭親左腳,直情連放低隻腳都痛到爆,所以都係坐輪椅穩陣啲。
因為出入唔方便,大班噚日就同馬丁調位,等馬丁可以坐喺通道口。李國章見到老友咁款,都上前問候,仲介紹馬丁食一隻藥,果然係患難見真情。
老董腳痛落台,馬丁又點?佢笑笑口話佢嗰隻唔係「食糊腳」,即係唔使落台啦。至於點解扭親,馬丁死都唔肯講;八方見佢去廁所都要勞師動眾,要成幾個立法會職員扶佢入去咁慘,都唔忍心再追問落去。
立法會另一個鐵拐李,即係寶哥哥,噚日被人笑佢唔識寫卿姐中文名時,即刻話咁講係侮辱佢。卿姐就意有所指咁話佢識寫喎;換言之,即係有份喺財委會投卿姐一票做主席嘅,包括寶哥哥在內啦。