地產多聲道:擎天樓高參天大連行家讚歎

蘋果日報 2003/09/04 00:00


中港交流愈嚟愈密切,香港發展商不斷北上宣傳,內地發展商亦頻頻來港觀摩。噚日九龍倉招呼嚟自大連嘅行家,睇尖沙嘴擎天半島示範單位。而九倉同佢哋喺大連合作嘅大連時代廣場,總樓面約一百八十三萬方呎。
大連市房地產開發管理辦公室主任張永林話,今次來港主要係參觀物業用料,同了解吓管理方面嘅運作。佢哋大讚物業用料好,佢重話,大連住宅最高都係五十幾層,香港住宅竟然有八十層高,真係歎為觀止。
張永林此行重有另一個任務,係為大連七個項目招商,當中八成係普通住宅,其中一個係泉水新區項目,其餘就係商住同高檔住宅。佢話𠵱家有五個集團表示有興趣,分別係大光、威新、榮茂、運盛同招商局。

樓市轉角施永青急報喜
中原(香港)八月佣金收入七千五百一十七萬,比七月少咗約五個巴仙,主要係住宅部佣金下跌。不過,中原地產董事總經理黃偉雄喺公司嘅戰報就話,上個月總共有八間分行佣金超過一百萬。香港舖位部B組奪得冠軍,佣金有一百六十四萬一千蚊,第二位係堅尼地道分行嘅一百三十七萬一千蚊;長沙灣及葵涌工業部都榜上有名,排第四,佣金一百二十萬二千蚊。
另外,由於最近樓市明顯暢旺,集團主席施永青今日會親自開記者招待會,內容會講商舖同豪宅已出現轉角市。唔知最多人關心嘅中小型住宅,幾時至有轉機呢?
維景灣畔細單位吃香
將軍澳維景灣畔係大型屋苑,有不同尺碼單位供選擇,太古地產高級營業經理馬淑貞話,屋苑嘅一房單位相當受歡迎,部份座數呢類單位已經賣晒。
至於三房連多用途房都有唔少捧場客,已經賣咗九成,可見呢個盤吸引唔少單身一族同埋大家庭買家。
發展商話,自從六月開放現樓示範單位後,總共賣咗超過四百個單位,當中佔咗六成的樓價介乎二百萬至三百萬,平均呎價三千三百幾蚊。

長實搵拍檔催谷東方廣場
長實北京東方廣場商場「東方新天地」,不時都搞新意思推廣樓盤,七月份搞咗個「世界風情嘉年華」,最近發展商又宣布,同新加坡「新達城」結盟為姊妹商城。
新達城總裁王仟東話,今次結盟,可以建立一個業務平台,雙方合作搞推廣活動,有助兩物業租戶擴展業務。
東方廣場董事長甘慶林話,可以奠定大家喺亞洲區內嘅購物天堂地位。
新地誘客有竅門
新地噚日臨時臨急舉行記者會,宣布三個貨尾盤喺今個月十五號起加價。又唔係即時加價,點解咁急呢?
新地代理總經理周國賢解釋,需要畀時間買家做準備。但講講吓,先知道原來係集團創辦人郭得勝當年賣樓嘅傳統作風。
其實好多發展商都喺加價前十零日,就會對外公布,目的好明顯係催谷啲心大心細嘅準買家快啲落實入市,營造趁平買嘅氣氛。
不過,要留意點樣掌握由宣布至正式加價嘅時間,因為太長就營造唔到迫切嘅入市氣氛,太短又怕未成氣候。
蘭西
電郵地址:[email protected]
empty
維景灣畔平均呎價三千三百幾蚊。
empty
施永青
empty
甘慶林話(右二),結盟後有利雙方喺亞洲嘅發展。