平安夜前夕，大市夠晒平安，皆因芬佬同分析員大部份放晒假，有返工嘅都無心戀戰，所以大市靜到暈，全日先至升得1點咁大把，港股基本上乏善足陳。
噚日比較矚目的股份，亞洲金融（662）係其中之一，其實江湖傳聞亞洲金融出售銀行業務有好一段時間，兼且炒到不亦樂乎，但先前兩次通告都講到含含糊糊，直到噚日嘅通告先至話已收到12份標書。
可能亞洲金融早排升得多，好消息已部份反映，所以噚日隻股復牌並無之前咁哄動，亦較預期升得少，但仍有8.4％，收2.90元，上試早排高位，其實算唔錯。
不過經紀黃話，主要原因係今次亞洲金融可能只係出售銀行業務，並唔涉及控股權變動，加上就算賣得成，股東們亦未必有錢分，所以有咁表現唔出奇。亞洲金融昨日成交股數1480萬股，金額4333萬元。
經紀黃又話，亞洲金融到明年1月至會畀有意嘅買入銀行業務投資者做財務審核，基於有排都未賣得成，短期內再有風吹草動，隻股可能出現大波動。
慕容小初