香港政客面皮幾呎厚，講大話、僭建、囤地自肥都唔使落台，不過世界其他地方嘅政客就有羞恥心得多。巴西搞世界盃搞到一鑊粥，總統羅塞夫決定避風頭，唔出席下月13號嘅頒獎禮，同樣國際足協會長白禮達亦都笠水，大會就搵嚟荷李活巨星里安納度迪卡比奧（Leonardo DiCaprico）嘅名模舊愛Gisele Bundchen做頒獎嘉賓，靚女出面應該可以淡化吓啲民怨。

總統會長齊潛水

巴西搞世界盃花費百億計美元，不過國內貧富懸殊問題嚴重，各大城市幾乎日日都有示威罷工，羅塞夫仲未知死，揭幕禮照樣現身聖保羅體育場，結果被主場球迷噓到爆。同樣頒開獎嘅白禮達，就因為卡塔爾奪取2022年世界盃資格引發貪污問題，搞到一身蟻，亦都決定7月13日嘅決賽唔頒獎；兩位重量級人馬都唔頒，唔通等冠軍隊自己上台拎咩，33歲巴西名模Gisele就冷手執個熱煎堆。
美國《波士頓環球報》就報道，國際足協為咗搵頒獎嘉賓都好頭痕，事關以往都冇特定頒獎者，好似上屆就由白禮達頒獎，前屆德國就搵個小朋友頒獎，02年頒發者係比利㖭。Gisele做過世界top model，又曾經係里安納度嘅舊菜，國際知名度夠晒，之前仲同巴西前鋒尼馬合拍時裝雜誌封面，球迷更加受落。不過據報佢老公、美式足球運動員湯畢利都會陪佢出席，如果到時係巴西對美國，Gisele到時撐自己國家，定捧老公嘅國家呢？

LV皮箱引土豪

國際足協搵得名模頒獎，成件事當堂潮晒，自然唔少得潮物出場。據講國際名牌LV就會特製一個皮箱，專門入住個獎盃，等Gisele拎上頒獎台；LV一向係闊太恩物，或者完成決賽之後，仲吸引埋啲土豪球迷想訂番個世界盃冠軍皮箱。

識睇　一定睇蘋果嘅足動世盃：
http://worldcup2014.appledaily.com/