現時Hugo已加入組合「Retroll HIP HOP」大家齊上齊落搞音樂創作，組合共有八位成員，剛過去聖誕節他們又有新歌《衰跑車》推出，歌曲在YouTube上架，歌名取諧音水炮車，歌詞中道出抗爭者及社區環境被水炮車衝擊帶來傷害，又勁寸聖誕TG放題及警暴，Hugo說：「首歌講一個藍色好衰嘅車遊走 香港 。」由於歌曲帶有粗口，Jerry即作出指引未夠18歲不宜收聽。

抗爭期間有藝人高調撐警，陳百祥更是頭號中心人物，遭網民鬧爆，幾位不足30歲年輕新一代明白政見不同但良知重要，Angus說：「有立場冇問題，最唔舒服係討論過程中，睇到杜汶澤同叻哥去爭議時，佢一被人打敗理據就用無賴方式去帶過，覺得自己係啱，做咗咁多年人，好應該為下一代做好榜樣，咁樣都好，係一個反面教材，佢哋表態唔會影響 香港人 ，香 港人 大部份好有良心知自己諗乜，我唔會因為一個壞人講出一套歪理而去信服，唔需要因為佢哋而嬲，要繼續用我哋良知去感染多啲人，令大家知道喺社會上咩係愛同自由。」

Heartgrey力斥盲撐警：「對於撐警啲人我有嘗試過企佢哋角度諗，點解蒙住面都話睇到個樣呢？我會當咗佢哋係另一種動物，唔需要再了解佢哋點諗，佢哋相信自己立場，咁我咪同返我同類動物一齊。」

曾幾何時藝人站台有公信力，對巿民有深遠影響做個好榜樣，早前譚詠麟、鍾鎮濤高調撐警後賠上香港巿場，同時令香港粉絲失望。Jerry說：「過往公眾人物好緊要，係大家學習對象同參考，今時今日唔同咗，藝人同的士司機差唔多，阻住佢搵食就唔得，好似成龍佢話佢冇讀過書佢唔識，但我哋大部份香港人有讀過書，知道大家守護緊普世價值，所以大家唔會因為錢去守護，今時今日有啲藝人已經唔係值得我哋學習，唔睇晒全部知啲唔知啲又走去發聲就搞到咁。」Angus說：「的士司機每日聽收音機佢哋都知發生緊乜事。」

Hugo則說：「無論你立場點都好，唔贊成停留喺溫層，長期咁樣唔會接收到新事物，唔會知世界發生乜事，有啲香港人心態好自豪自己唔知道一樣嘢，好似香港樂壇好多新歌曲新歌手，佢哋會話我唔知歌手係邊個未聽過呢首歌，係好反智行為，人係應該想知道多啲嘢，竟然有人覺得唔知道係好驕傲嘅事，值得宣揚崇拜，無論立場點都好，呢個先係最大問題。呢個社會啲人相信大於事實，就似邪教一樣，相信咗唔需要搵事實真理，身處咩立場FC都好重要，現實發生緊咩先可透徹知道。」繼文說：「話佢知文宣同事實性佢哋都話睇唔到，隻貓隻狗唔明你講咩，冇理由係咁用人話同佢講嘢。」