一年前的母親節，會展上演拳擊世界青年冠軍爭奪戰， 香港 代表潘啟情（Raymond）與中國的李翔激戰12回合後落敗。這場敗仗，潘啟情不只輸了腰帶，也輸了一條較安穩的前路。不過，這位24歲拳手不會因此而倒下，在「疫」境下更要自強，Raymond更會教各位在家中都可以打拳練心肺功能。

Raymond的拳擊路像坐過山車，曾被拳館勸退，之後找到伯樂，成為曹星如師弟，跟著師兄比賽，到曹星如離開拳館後，比賽機會大減，苦等多時後終於在修頓首次擔大旗，去年更在主場挑戰WBO輕蠅量級世界青年冠軍金腰帶，但對李翔一戰最終落敗，拳擊路可算是跌到落谷底。Raymond不只世青冠軍夢碎，前路也變得相當崎嶇，訓練量開始減少，也看不到再有比賽的機會，回想當時的心情，Raymond說：「嗰段時間有好多低潮，好多心理上嘅事冇處理好。輸咗之後，好似全個世界都玩完，失落情緒困擾自己。」在那場比賽後大約半年，Raymond終於也跟曹星如一樣，離開這間令他成名的拳館。

離開，其實可能是唯一選擇，「當時連訓練都開始減少，似乎再冇辦法接受職業拳擊訓練，我就諗不如去其他地方，教拳收入會高啲，又可以保持訓練，搵教練幫自己。拳擊運動員最緊要係訓練，當喺一個地方冇辦法得到好嘅訓練同比賽機會，我覺得要去一個新嘅地方。」去年的那場世青冠軍賽是Raymond拳擊路上的一大轉捩點，如果贏了，之後的路會是如何？Raymond曾經想像過無數次，「可能好多嘢都會好唔同，條路會順啲，訓練唔使減，唔使轉教練。但係如果贏咗，其實對拳館同贊助商嚟講，可能都係冇乜分別。」

無論如何，賽果已無法改變，Raymond也在新拳館重新出發，繼續教拳，也繼續練拳。再想想那段低潮，Raymond已經放開了，「轉到新拳館後，最大轉變係我對上場比賽釋懷咗。」新的拳館，新的生活，Raymond再次一邊教拳，一邊練拳，本來上月有到 泰國 比賽的機會，卻受到阻力而落空，「以香港拳手身份出啲職業拳擊比賽，都要得到香港職業拳擊協會批准。」這個協會的主席，正是Raymond的前推廣人劉志遠，Raymond續說：「好難處理，都唔係難，係處理唔到，我家陣嘅老闆搵過佢，其實都搵唔到，訊息都唔覆，所以我要繼續打職業拳擊，難度好高。」若一直未能得到回覆，Raymond想續戰職業拳擊，可能就只有轉國籍一個辦法。

曹星如也轉戰業餘拳擊，向奧運進發，Raymond也不排除自己會轉戰業餘，「如果職業拳擊已冇希望，業餘都係一個渠道。喺香港打拳嘅都係因為鍾意，有幾多人會賺到大錢，做到美韋達吖？我都想為自己、為香港做啲事，爭取更大榮譽，奧運都係出路，但係打法要再好好適應。」不過，Raymond未言放棄，為延續職業拳擊生涯而努力。

記者/攝影：禤家民