香港人環保意識愈嚟愈強，之不過，有冇諗過除咗節約能源、用環保袋購物、將垃圾分類回收之外，原來仲可以藉住你嘅投資行為，影響上市公司推行更多環保措施，令呢個世界變得更美好！
東方匯理噚日就推咗隻綠色環保基金，專門投資喺美國上市、摩根士丹利環球指數1600家公司中，最具環保意識嘅200至230家公司。東方匯理資產管理經理姚強噚日喺記者會上介紹，呢類具有社會責任嘅基金喺美國好受投資者歡迎，10年內涉及資產管理規模由當初4000億美元，增加到2.3萬億美元；歐洲規模亦相若。至於香港起步較慢，近呢兩至三年開始先有呢類基金畀投資者揀，但基金數目數埋唔夠十隻手指。
咁呢類基金回報狀況又如何？佢話中長線以高於大摩環球指數為目標；而且呢類基金面對嘅風險──至少喺環保問題上嘅風險會較低。呢隻基金今年3月以強積金形色推出，已錄得800萬元認購金額，入場費1萬蚊。