之前有新聞講到歐洲有一個金融會議，一位來自星展銀行嘅創新總監向與會者講大陸金融科技發展，同埋提到內地金融科技投資1,000億美元，係全世界其他地方總和的4倍，嚇到啲外國勢力嘩嘩聲，與會者好驚訝原來內地金融科技發展到一個地步，由一個App幫你喺旅行時搵酒店、搵的士、搵機票，仲要一次搞晒支付。

問題係，上市公司當中，你買騰訊（700）同平保（2318），其實只能買到金融科技業務嘅少部份，你要搵一隻股全方位食盡內地金融科技發展，唔易；喺A股有恒生電子，但呢類股俾中央打壓的話，亦可以打得好慘，所以都幾高風險。再講，小弟亦原則上唔願意買A股，事關防走資之下，總會驚啲錢有入冇出，到時你贏幾多都冇用。

說穿了，喺香港上市公司當中，要搵到真正嘅金融科技概念股，並唔容易。

之所以騰訊股價可以創新高，原因係互聯網金融業務，喺大陸就係可以亂咁玩，你背後有勢力支撐，只要唔出事，就可以有幾盡玩幾盡。騰訊旗下微信本來有幾億客戶基礎，如果喺大陸玩互聯網金融玩到無極限，騰訊隨時贏到無雷公咁遠，可見將來都未必需要搵另一項新增長點，剩係玩金融、支付加廣告都夠。

肯回的話，騰訊始終係可以買的。可見將來，不妨喺現有上市公司當中，發掘吓全方位經營金融科技配套服務嘅公司，有的話，趁早買，隨時贏開巷。

掌握財經生活資訊，即Like「蘋果ATM」fb專頁啦！
http://fb.com/appledailyatm