車路士職球員今晚喺車路士村酒店集宿，備戰歐冠盃之餘，重會睇實「阿熱之戰」。只要阿仙奴砌唔低熱刺，「車仔」就可以慶祝──美中不足係摩連奴講明無得開香檳。講時講，舊年阿仙奴喺熱刺白鹿徑球場落實封王，今年就可能主場對熱刺時正式宣布衞冕失敗，都咪話唔諷刺！
摩連奴故技重施
摩連奴舊年帶領波圖贏聯賽冠軍，亦係集宿睇住爭標對手失分後慶祝，重即時喺泳池飲香檳開派對；摩連奴承認今年有樣學樣，唯一唔同係歐冠盃大戰當前，唔准球員飲酒。唔緊要啦，「車仔」準備好下個月二十八號搞大型party，慶祝球會成立百周年兼今季攞到咁好成績。據講到時所有英國當時得令嘅歌手都會到史丹福橋球場唱歌助興，真係有咁高調得咁高調囉。「車仔」職球員使休無機會喪玩？
紅軍輸波兼折將賓帥鬧水晶宮踢茅波
利物浦歐冠盃前出師不利，輸畀護級嘅水晶宮，領隊賓尼迪斯賽後大呼水晶宮踢茅波，搞到佢哋班球員受傷，好似巴路士就傷出，重未知可唔可以趕及復出。我求大俠就覺得，「紅軍」球員錫身要踢歐冠盃，但水晶宮搶分心切，有主場之利踢得主動唔出奇，賓帥唔怪得人喎！
警方防暴演習荷蘭躉假戲真怒
荷蘭球迷一向投入足球比賽兼暴力，當地警方最近請咗一批球迷，進行緊急疏散演習；警方要求佢哋扮用石頭掟向防暴警察，但最後因為班球迷太認真，警方被迫終止演習。荷蘭球迷嘅暴力傾向同英格蘭、德國球迷差唔多，但連演習都當真，怕且荷蘭警方次次都要真打先搵到預防方法。
皇馬財困勁蝕61億死敵巴塞換基地曬命
巴塞同皇馬喺聯賽爭崩頭，兩隊財政狀況亦惹人關注。最近有報道指皇馬赤字達六億歐元（約六十一億港元），幾乎係所有意甲球會虧損嘅總和。至於巴塞雖然亦有虧損，但會長就話財政前景良好之餘，新起嘅訓練基地將喺十一月投入使用。邊隊個勢好啲，盲嘅都知喇！
女友高蓮向外爆料朗尼19歲玩結婚？
朗尼早前喺公眾場合打女友引起外界關注，重惹起佢嘅贊助商相當不滿，要脅終止現有贊助合約。不過，有消息傳出朗尼六月會同高蓮拉埋天窗，而且係高蓮向其他球員嬌妻好友自動爆料，朗尼雖然三緘其口，但消息人士透露成事機會相當高，但朗尼得十九歲，係咪早得滯？
逢周一至周五見報