經紀陳品題的豊采多媒體（764）真係有得炒，收0.455元，升30％。但奇就奇在除咗豊采外，其他濠賭股就算龍頭新濠國際（200）同信德（242）都有沽壓，前者跌6％，後者亦回落3.7％。究竟市場對濠賭股有咩睇法？小初真係諗唔通。
除咗呢樣嘢奇之外，重有係豊采阿媽中國星（326）在阿仔逆市炒到飛沙走石之時，股價竟然絲毫未見受惠，重要倒跌2.2％，收0.445元，成交股數514萬股，金額232萬元，睇落去覺得唔對路。
經紀陳就話，中國星將於4月26日公布截至去年12月底全年業績，阿仔股價升而阿媽冇反應，可能與業績表現有關。
另外，經紀黃愛股泰興光學（389），噚日失驚無神停牌，話有敏感消息要公布。經紀黃收到料，隻股早前批股同發行可換股債券交易，其中債券交易好似有阻滯，或者要另找融資安排。
慕容小初