噚晚喺上海，英倫時裝品牌Burberry舉行旗艦店活動，城中唔少名人都有出席，好似有新姬魔CaraDelevingne、Angelababy(楊穎)、劉嘉玲、林志玲、趙薇及桂綸鎂等等，Baby嘅寶石紗裙原來之前祖兒都著過，Baby仲疑似露出底底，總之各有各靚啦。

見到Baby，點都要講一黃曉明。Baby就話早排同埋曉明嘅爸爸媽媽一齊去南韓，幫曉明媽媽慶祝生日，佢話：「係一齊去慶祝，有十幾個人，同埋佢爹地媽咪，佢好錫屋企人，希望係帶佢哋環遊世界，佢屋企好人同好好玩。」

一齊去旅行，睇到都好事近，Baby仲行埋奶奶政策，同曉明送咗隻手錶畀未來奶奶，咁曉明媽媽會唔會生日願望係Baby同曉明結婚，Baby就話：「冇，佢哋好開通，所以同佢哋相處無壓力。」

另外，嘉玲就話近日忙住同梁家輝、謝君豪合作嘅舞台劇籌備：「2000年同家輝合作過，嗰時唔識舞台劇，依家認識咗，知咩係享受。」講到偉仔失落影帝，有冇安慰對方，佢就話：「唔會，不過自己有少少唔舒服，作為一個獎項佢輸得起。一代宗師係梁朝偉，套戲攞到咁多獎，點解佢冇攞獎。」