八方之前都寫過，高登女神謝安琪嘅樂壇好拍檔、音樂創作人周博賢考慮新一屆立法會選舉，出戰體育、演藝、文化及出版功能組別，硬撼現任代表馬逢國，真正為業界發聲。

嗱嗱嗱，利申一下先，八方都係呢個界別㗎，但好無奈，無個人一票喎(咁其實仲使唔使利申？)而其實點解，明明係呢個界別又冇票咁唔公平呢？係咪隔住電腦，都感受到八方嘅憤怒？呢方面，「樂壇長毛」較現任代表更掌握民情，佢喺facebook拆解呢個界別選民登記騎呢位。

周博賢話呀，其實呢四個業界組成嘅界別，選民以總會/協會/公司等團體佔多，個人近乎唔能夠登記，所以有以下奇特現象：運動員，其實無票；個別藝人或歌手亦無票；創作人如顧家輝、Wyman同林夕，都無（大大個CASH只有一張公司票！）而小型出版社若果唔屬於大出版協會，或無根據《本地報刊註冊條例》註冊為出版報刊出版社，都一樣：無票！

不過呢一屆，都冇變法改做個人票㗎嘞，咁仲有乜方法抗衡？咦？組織「促進藝術」嘅團體、又受過政府資助，係團體咪有票囉！係呀，但周博賢提提大家，重點係要先登記做選民，「以我所知，有不少藝團成立多時，但仍未登記或不清楚自己有否登記做選民」，如果唔確定狀態，不妨打去選舉事務處28911001查詢。

嗱嗱嗱，佢又提醒大家，「某些個人是有票的（幾平等？！）但只限某些演藝或出版協會的個人會員，登記表格在此（ http://www.reo.gov.hk/pdf/form/reo-41.pdf ）。」

聽到呢到，大家可能都嫌煩，周博賢點會唔知，但佢話：「花半小時左右完成以上程序，或可改變未來4年在立法會『被代表』的命運，應該值！」。佢話唔敢保證係咪有得揀，但老套都要講句「機會是留給有準備的人」，「況且，我相信今屆是有得揀的」，唔通預告，出戰機會唔細？

佢仲搵咗明哥粉墨登場，拍片你分享填表心得，呼籲業界5月2日截止日期前登記，火速行動！