話咁快已經係5月，倒數完佛誕，7.1回歸騷又嚟。上年因為參加咗7.1啟德維穩騷搞到周身蟻嘅RubberBand同MR.，都分別捐出歌酬做善事，RB捐咗$72,000俾「區區有飯開」，而MR.就捐咗35萬俾三家慈善機構。點解個數好似相差好大呢？其實係因為MR.連唱片公司抽佣嗰份都捐埋出去。

噚晚RB都有會展出席新城舉辦嘅「為80後喝采音樂會」，雖然之前RB辭演咗新城做搞手之一嘅澳門5.1騷，但RB是夜仍任表演嘉賓之一。其後朱明銳入後台同RB合照，合照完就話:「音樂就係一切，乜嘢都唔使講，總之支持好音樂!」

講到話MR.捐出去年7.1維穩騷歌酬做善事，RB就表示佢哋已經將自己全數歌酬捐晒去「區區有飯開」:「呢7萬2係我哋自己嗰份嚟，至於公司同經理人嗰份就控制唔到喇。」

日前MR.出席街頭音樂會時，被問到如果今年又搞7.1維穩騷，會否出席？MR.當時就話:「音樂會同政治可以分開，如果咁落去，會唔會連音樂會都冇得做呢！市民選擇係清晰嘅。」但就補充一句謂如果撞期有其他嘢做就去唔到，仲話:「我哋呢幾個月要去星馬、北京、廣州，所以到時都唔喺香港。」

至於RB，就比MR.更明確表示唔會去，因為一早已經向唱片公司攞咗假:「嗰日各有各工作，同埋有正經嘢做，已經攞咗假，公司都俾放。我哋就好似自由身球員咁，而且公司已知我哋嘅想法。個個都係大人嚟0架喇，唔會勉強。」

相關新聞:
今年7.1都有維穩騷MR.去唔去？「音樂會同政治可以分開！」: http://bit.ly/1idrVXg