當年今日

【演唱會九次落淚 】容祖兒Encore時段出場 激讚欣宜:呢個肥妹仔超級有自信

蘋果日報 2016/10/23 00:15

欣宜容祖兒肥妹仔女神有問題

喺欣宜嘅《女神有問題演唱會》到Encore時段,容祖兒出場喇,先唱欣宜一曲《有故事的人》,唱唱下,祖兒突然彎腰執嘢,仲話:「我跌咗耳環!」然後繼續唱,欣宜即衝出台前攬住祖兒,合唱完後抱抱,又互相讚對方好靚,祖兒又爆料謂:「Joyce開騷前有幾晚,不下數次同我WhatsApp,喊住口話好擔心。我都知你今次為咗呢個騷好多壓力。」
祖兒謂早年喺溫哥華做騷時認識欣宜:「當時佢仲讀緊書,一個肥妹仔,呢個肥妹仔超級有自信,未見到佢個人已經聽到佢把聲。佢係好孝順,嗰陣肥姐唔知因為乜嘢事需要坐輪椅,但欣宜都會好細心咁安頓好媽咪坐低先,佢好似我咁孝順。」

「同埋欣宜另一樣嘢似我嘅就係,觀眾第一眼見我哋,特別係男觀眾,唔會係吞口水嗰類,而係會反白眼嗰類型。雖然係咁樣,但我就對自己講,雖然係咁,但大家一聽到我把聲係會鍾意我哋。我哋都係好努力,見欣宜呢幾年好努力做嘢。可能有一次做騷,個個都會合埋眼去聽我哋唱歌,但依家欣賞到你嘅,個個都會由頭望到落腳。」
欣宜亦非常感謝祖兒應承做頭場嘉賓:「因為噚日打風,佢好主動咁打嚟,話今日會出席,仲笑笑口話『我會出席0架,打完風就會嚟。』」至於祖兒提及兩人初次見面嘅溫哥華騷,欣宜都記得:「嗰陣祖兒喺度綵排,媽咪同我講,佢話:『阿女,你將來大個要好似祖兒姐姐咁勤力。』雖然我依家未做到,但係我都會好勤力!」祖兒再謂:「我哋兩個都好特別,有頑強嘅生命力,人哋覺得我哋做得未夠好,我哋就會盡力做到最好,希望你可以好好享受掌聲,同埋將來舉行一個更大型嘅騷。」
欣宜聞言即「哎呀!祖兒呀!」請祖兒再唱一曲《無人知道雙子座》 ,欣宜就伴舞。
完騷嘅時候欣宜就多謝各個制作單位,又特別多謝許廷鏗,又話開騷前一晚都有打畀許廷鏗,因為自己好擔心,成晚每一次欣宜多謝人都會喊,成個騷喊咗9次,佢話:「開騷前我覺得乜都唔好煩到人,乜都自己做,但今次可以睇到我唔係孤單一個,個個都好鍚我。」