免費當小model試水溫
思琦3歲囡囡 跳芭蕾舞賣萌

蘋果日報 2015/05/16 00:00


楊思琦一向是好媽媽,擔心3歲大的囡囡楊卓穎(Krystal)在單親家庭長大,所以特別痛錫。思琦除了安排囡囡入讀名牌幼稚園,與陳慧琳細仔劉琛(小龍包)成同班同學外,空餘時間又讓囡囡參與游水、畫畫及跳芭蕾舞等課外活動。
昨日在第二代美心妹妹Keicy(胡梓盈)的facebook內,發現思琦囡囡Krystal與Keicy的妹妹Kassy為SDM Jazz和Ballet Academie拍攝一輯宣傳照,並寫着:「場面sweet sweet好開心呀,希望快啲見到啲靚相啦!心心眼,期待。」
考慮母女檔上陣
據相中所見,Krystal越大越似媽咪思琦,她與Kassy齊齊打扮得靚靚,束起頭髮及穿上粉紅色芭蕾舞裙影相。首次當上「小model」的Krystal沒有半點怯場,在攝影師哥哥指導下,要趴在地上扮花,又要伸高手、交叉腳跳芭蕾舞,仍表現得有板有眼。而且兩位小妹妹似乎好老友,經常互搭膊頭拍照,Krystal更將身子挨向Kassy身上邊,凸出小肚皮,十分可愛。
empty
吳帥
empty
楊思琦囡囡Krystal(右)初次入影樓影宣傳照,與Kassy齊齊叉腰擺甫士,有板有眼。互聯網圖片
empty
在攝影師哥哥指導下,Krystal(中)和Kassy齊齊趴地影相。
互聯網圖片
思琦昨日在電話中透露今次拍照沒有收取酬勞,她解釋:「其實係小朋友玩吓,唔係廣告相,只係一啲內部活動。」她表示囡囡喜歡音樂,並具演藝細胞,她說:「佢聽到音樂就會郁身郁勢,知道佢對跳舞有興趣,所以畀佢學,但唔會逼得太緊。」問到會否母女檔上陣拍廣告?她說:「有合適嘅會考慮,順其自然啦!」
思琦早前要到橫店拍劇,所以未能與囡囡一同慶祝母親節,但仍收到母親節禮物,令她甜在心頭說:「學校教咗佢整花同卡送畀媽咪,裏面仲有我哋張相,佢同我講『媽媽,I love you.』真係冧死!」
採訪:唐如、嵐山