英超聯、西甲、德甲、意甲同歐冠盃嘅直播波大家都睇得多，有冇諗過轉轉口味呢？絲帶台今晚深夜就會直播森林迎戰狼隊呢場英甲大戰。咦，不嬲絲帶台都冇播開直播波㗎，今次突然播場英甲畀觀眾睇，九成就係為第日馬會開賭波鋪路。
賭波喺今個夏天都會合法化，重會由馬會一手包辦，𠵱家絲帶台無情白事直播場英甲，動機好明顯，好大程度係為第日嘅賭波節目鋪路。講真呀，絲帶台咁做真係幾聰明，事關歐洲四大聯賽同歐冠盃嘅直播播映權都畀收費台攞咗，佢哋就轉向英甲呢啲水準唔差兼有啲番士嘅聯賽埋手。
絲帶台咁快就出招，睇嚟三色台遲吓應該會做番啲嘢，冇理由見到咁大塊肥豬肉都唔去食。如果連佢哋兩個台喺遲吓都會定時喺深夜有直播波睇，最終得益嘅就一定係我哋呢班球迷。

馬白蘭基叫走富咸大忌
自從星期一俾布力般大炒四球之後，富咸散班差不多已成為定局，而表現最穩定嘅馬白蘭基都開腔話會跟泰簡拿喺季尾離隊。馬白蘭基原本同富咸合約重有三年先滿，今次表態，為隊中法國兵大逃亡拉開序幕，𠵱家隊中主力法國兵有高馬、迪捷圖、馬列同沙夏，今個星期作客對利物浦，分分鐘再被大炒。