股海實戰錄:形勢利淡友出擊

蘋果日報 2002/03/25 00:00


美股上周五跌幅雖然唔算大,但技術上杜指20日線(現處10452)失守,納指50日線(現處1868)失守,都係利淡訊號。外圍美股轉淡,形勢對淡友更有利,周三期指結算,淡友今日估計大舉出擊。
恒指上周四跌穿50日線,周五雖有輕微反彈,但始終無法重返其上,再參考埋其他技術指標,如MACD線跌穿訊號線,都係展開較大調整嘅訊號,如果持貨太重,應考慮減持。由各種迹象顯示,恒指短期下試10400嘅機會相當大。
趙飛雲上個禮拜五沽清貨,除咗睇淡本周港股走勢外,亦因為倉內3隻股票嘅技術形態已被破壞,短期暫難轉弱為強,與其死守等下一個升浪,付出較高機會成本,倒不如先止蝕套現,尋找更佳投資對象。

中移動暫緩撈底
上周提過中移動(941)有機先到底,但上周五收23.30元,差些少亦唔肯升穿50日線(現處23.40元)收市,並非吉兆。如果今日淡友大舉出擊,中移動難免成狙擊對象,撈底博反彈行動須暫緩。不過單以電訊股而論,中移動始終係首選,可等候低吸。
趙飛雲