鮮蠶豆 健康小食

蘋果日報 2002/07/29 00:00


炎炎夏日,我肥師奶鍾意食瓜及食豆,瓜水份因為較多,可補充失去嘅水份,所以無論苦瓜、絲瓜、水瓜、冬瓜我都鍾意食,至於豆類,我會選擇蠶豆,其中鮮蠶豆更係我夏日必食之一,因為有健脾祛濕功效,胃口欠佳食佢最適合。鮮蠶豆豆仁飽滿肥大,將佢拆出清炒蒜茸或用嚟炒飯都好和味㗎,作為小食有益又健康。
釘公 細條好食
釘公魚唔算貴價嘅魚,清蒸、煲湯都得,最啱夏天食。聽魚檔啲人講,釘公重有兩個好得意嘅名,叫做「吟詩」同「極及仔」,原來個名嘅來由係因為呢種魚離水之後,會發出一啲好有節奏嘅「極及極及」聲,好似「吟詩」咁。
買釘公時最好選細細條二、三両那種,太大條反而無咁好食。
文:肥師奶