兒童天地:
靚車鬥一番

蘋果日報 2002/07/21 00:00


喺玩具界,呢期特別多新車推出,Size有大有細,喺屋企玩又或帶出街玩都一樣咁開心!車款方面,有齊跑車、消防車、工程車及巴士,想要特別啲嘅車款,大可選擇由機械人變成的跑車及Q版農夫車。小朋友有無興趣揀番部靚車,實行成為新車主!

記者:張穎倫 攝影:伍慶泉
ImageKids:張博之、張朗芝
倫敦巴士有埋交通燈
小朋友平日見得最多就係巴士,所以好多小朋友都特別鍾意巴士車仔。好似呢架紅色嘅倫敦巴士,唔單止識着車頭燈,重有埋紅綠燈及路牌指示,令小朋友玩得更投入。
消防車緊急出動
每當遇有火災或交通意外的時候,只要你一㩒消防員個頭,呢架消防車就會發出警號然後趕赴現場,同時黃色嘅水炮亦會不停轉動,雖然唔會噴水,但營造出嘅緊急氣氛,已經夠晒好玩。
工程車吊臂任你校
同倫敦巴士一樣,都係doCITY系列嘅車仔,除咗識着車頭燈之外,車上吊臂亦可隨意伸長或改變角度。再加上吊臂可將同系列嘅各類型車仔吊起,等小朋友可以一嘗當工程人員嘅滋味。
農夫車動物識得叫
喺香港冇可能見到嘅農夫車,車上除咗載有得意嘅豬仔同牛仔外,車身更有三個按鈕,按下之後會分別播出引擎、牛仔同豬仔嘅叫聲,加埋識着嘅車頭燈,連大人都想玩埋一份。
極速鋼鐵戰士變跑車
男孩子除咗車之外,亦鍾意機械人,所以最新嘅RoboWheels系列,就大玩機械人變跑車。好似呢個隸屬尼加波斯戰隊嘅魔斧怪,除咗變成跑車外,更可以企喺底盤上,當滑板踩夠晒有型!
飛馳跑車識向後行
喺道路上開快車就怕有危險,但呢架玩具跑車就一定安全,只要按一下飛車小英雄個頭,車身嘅車頭燈就會亮起,然後就聽到轟隆隆嘅引擎聲,跟住跑車就會彈射起步,飛馳而去。撞到障礙物又識向後行,十分醒目!
牛牛巴士好得意
經常出入將軍澳同牛頭角嘅小朋友,一定見過呢架得意嘅牛牛巴士,呢架屬於796A路線嘅新巴,來往將軍澳彩明苑至牛頭角,車身嘅彈弓牛仔Cutie到震,好多小朋友都要媽咪帶佢坐,𠵱家變成模型車就更加要帶佢返屋企啦!
出車處:

Jotus.comLtd.(25056448)
柴灣祥利街29-31號
國貿中心28樓10室

吉之島(24527333)
屯門屯順街一號
屯門市廣場一期地面高層

三越百貨(25765222)
銅鑼灣軒尼詩道500號