范鴻齡當行會係廚房 - 李八方

蘋果日報 2006/01/21 06:00


行會新貴、中信泰富董事總經理范鴻齡昨日見記者,因為佢間大寶號將又一城一半業權賣咗畀太古,套現六十二億,咁大單交易當然要面對面同傳媒解下畫;除咗范鴻齡自己上陣,佢重首次帶埋大老闆榮智健個大仔榮明杰出嚟見吓世面,成個太傅咁。至於榮老闆就冇現身,唔知係咪小太子唔習慣見記者,抑或怕羞,范鴻齡代佢答晒啲問題,搞到終於有人忍唔住,要求小太子自己開吓聲,不過佢依然一句起兩句止,啲廣東話嘅程度,同佢爸爸一樣咁「流利」,都係聽番范鴻齡講算。
范鴻齡話,佢去年十月決定加入行會之前,小太子已負起重責,專注公司嘅上海業務;所以唔係因為佢太多公職,要其他人分擔佢嘅工作,而公職雖多,依然可以應付,只不過係將工作時間拉長啲,至於榮老闆個千金榮明方,就負責公司嘅財務。佢重自動報料,小太子個細佬榮明棣啱啱畢業,𠵱家入咗大摩紐約總部喎。
講完公司嘅嘢,八方再問呢位行會新丁,𠵱家政府仍然成日俾人批評,佢入行會有乜感覺?佢居然話:「入咗廚房預咗熱啦,希望唔會熱到支持唔住囉。」咁新年希望呢?答案係:「香港樣樣和諧啲。」
煲呔早前話研究公務員返五日工,行會成員中有幾多人支持呢?范鴻齡話中信泰富○三年已實施五日工作(不過要減五巴仙人工!),佢話,返五日工對大型公司唔會有問題,例如佢有份坐Board嘅中信泰富、大昌行、國泰同港龍,全部已行五日制,工作效率不但冇影響,員工士氣重提高咗㖭,因為大家可以在周末去個短旅行充電,而班高層都好負責任同有團隊精神,冇嘢做周六日就休息,有嘢做就唔休囉,之不過,五日制對中小企同服務性行業就可能有影響。
范鴻齡由商場轉入政壇,睇嚟適應得好快,應付傳媒亦有一手,講嘢亦掂,哈,唔知佢會唔會教番阿妹椒芬兩招呢?

傳真︰2623-9278
電郵︰[email protected]