政府噚日公佈，本月底先年滿54歲嘅「AO歌王」民政局常秘楊立門（圖）退休，其職位由康文署署長馮程淑儀下月中升任，教育局副秘書長李美嫦則升官做康文署署長。
狼振英做特首以來，已有多個官員跳船，除楊立門外，財庫局常秘區璟智，據講都喺今年退休。楊立門提早一年退休，相信同政府「熱廚房」越來越熱有關，事實上唔少高官對狼粉橫行、一班二三線政客講咗當做咗嘅所謂「執政」方式好不滿，加上立法會形勢凶險，去開會如同受靶，有得揀，當然走為上着。咁後生就退休，相信楊立門係唔使憂之人，加上唔少公營機構求才若渴，AO身份十分搶手，話唔定，已經有份剛剛出缺嘅筍工等緊佢㖭。