應采兒最失敗細路狂喊
馮仁昭四圍超:青雲湊掂BB𠱁老婆生仔

蘋果日報 2002/07/29 00:00


古天樂、劉青雲同應采兒噚日去咗藍灣廣場,出席電影《絕世好B》嘅宣傳活動,同場搵咗三個BB嚟搞氣氛,其中兩個重係孖仔㖭。

古仔餵餅衰咗
佢哋三個演員分別要餵BB食手指餅,青雲對住個BB表現得好啖定,見個BB一喊就塞嘢食入佢口。後尾青雲話,𠵱家都係適當時候,都會同老婆郭藹明考慮生番個BB。
而古仔負責嘅BB就成日扁嘴,後來重喊起上嚟,搞到古仔要自己食晒啲手指餅,個BB咁唔識貨,唔知會唔會恨到古仔嘅fans流口水呢?而古仔餵餅唔成功,就將個BB拋上拋落,真係牙煙喇!古仔就話將BB拋上拋落只係想氹BB,重話BB成日喺片場喊都幾煩,至於應采兒個BB就不停咁喊,搞到佢好尷尬。

張惠妹射水降溫
張惠妹(阿妹)嘅新唱片會喺下個月推出,而佢近日不停做宣傳。阿妹日前重為主打歌《狠角色》拍攝MV,要喺氣溫高達攝氏三十二度下工作,曬到成隻「燒豬」咁,但係阿妹都毫無怨言。
由於見到有份拍攝嘅小狗出現中暑嘅迹象,所以工作人員就向阿妹同小狗射水降溫。
曾志偉組E3撼F4
曾志偉、錢嘉樂同林曉峰三位獎門人主持,噚日喺奧海城出席「吾係獎門人之吾係送飛大行動」活動。不過噚日朝六點左右,已經有婆婆喺奧海城排隊等攞飛。志偉對於觀眾咁踴躍,晨早排隊攞飛,同F4有得比,佢就話說:「係咩?咁勁,因為我哋係E3嘛。」

陳小春大馬做騷黑面
早排傳去夜總會玩,之後又搶雜誌記者攝錄機嘅陳小春,上個禮拜六去咗馬來西亞為「2002Astro新秀歌唱大賽」做評審同埋表演嘉賓,佢唔知係咪因為呢單新聞影響,心情唔多靚,未上台之前,已經坐喺台下木無表情,完全冇笑容,後來上到台,司儀喺台上搞氣氛,小春仍然係黑口黑面。

馬蹄露騰雞照贏
前晚劇集《皆大歡喜》一班演員喺無綫參加遊戲節目《一觸即發》,最終由馬蹄露勝出。起初馬蹄露試玩時重驚到騰晒雞,完全冇諗過自己會贏,而謝天華試玩跌落深洞時重專登唔要提示,佢話:「冇提示重驚,增加刺激感。」
行姐兆尊唱情歌
陳彥行同薛家燕噚日出席何文田廣場嘅開幕活動,家燕姐話《皆大歡喜》嘅演員十一月會出唱片,其中有首歌係為鄧兆尊同行姐度身訂做,歌詞重好煙韌,行姐話:「啲歌詞會同兆尊打情罵俏,歌詞中重有幾句『哎呀!』但大家唔好諗邪嘢。」

莫文蔚轉贈流浪狗
莫文蔚(Karen)、韓尚志、李思蓓、戴辛尉同梁焯滿,噚日出席喺銅鑼灣舉行嘅「寶寶夏日寵物鬥一番2002」活動,現場有寵物表演比賽。愛心爆棚嘅Karen話,佢屋企都有養貓養狗,早排重收留咗隻流浪狗,不過最近轉送咗畀朋友。

張耀榮二億五撐阿B
張耀榮有意為啱啱申請破產嘅鍾鎮濤喺紅館籌備演唱會,張耀榮前晚喺蘇永康演唱會後嘅慶功宴上話:「暫定喺下個月二十六同二十七日,𠵱家等紅館批場地。」問到張耀榮會唔會畀多啲歌酬阿B,有冇二億五千萬咁多錢時,佢話:「二億五千萬日圓呀?睇吓到時點。」