呢排天時暑熱，行出街一陣，已經熱到似火燒，雖然《皆大歡喜》一個星期都有兩、三日外景，但比起其他拍古裝劇嘅同事，我哋已經算係輕鬆好多，聽講佢哋日日着住古裝衫，去到荒山野嶺拍外景，唔曬到你暈都焗到你暈。再講，有啲女藝員為咗減肥，連飯都唔食，再加埋啲咁嘅天氣，真係暈低都有知。
所以，今日我介紹一味既可防曬，又可以消脂嘅湯料畀大家，呢味湯水有清熱消暑、利尿去濕、防止身體出現濕熱不適，同預防出現皮膚濕疹嘅症狀，甚至有潤澤肌膚、消脂同降膽固醇嘅作用，經常在戶外工作或者運動嘅朋友就最啱飲，正所謂飲「防曬消脂潤膚茶，唔使擔心雙下巴」。
（五之四）
採訪：戴彩煥　攝影：陳慧安　顧問：何國璋中醫師