人人都話「人走茶就涼」，加上香港係一個趨炎附勢嘅社會，老董個名差不多第一時間就變成歷史名字，不過，好彩呢個世界重有些少人情味，八方聽聞，迪士尼樂園方面已心中有數，九月十二日樂園開幕之日，一定會請董生出席。
老董在位七年幾，最偉大嘅傑作之一就係同美國迪士尼斟點數，吸引佢哋嚟香港大嶼山開樂園，用英文、廣東話同普通話一齊演出，成為好多個第一，恨死新加坡。
香港迪士尼樂園集團行政總裁羅彬深認真長情，佢同八方講，實在唔可能唔請董生去開幕禮。羅彬深話，上個月一號下晝佢陪公司高層去禮賓府見特首，當時董生若無其事，大家重就樂園嘅未來發展傾得好高興，萬萬估唔到幾個鐘頭後就傳出佢辭職嘅消息，佢哋會面嘅相重上咗報紙頭版㖭。

傳真︰2623-9278
電郵︰[email protected]