曼聯中場米希達利恩（MK恩）喺周四歐霸盃4強首回合作客切爾達贏1:0場波把握唔到上半場單刀機會，冇份成為入球功臣。不過，會唔會係佢嫌呢球波唔夠靚先至唔入？皆因MK恩上個月喺作客3:0擊敗新特蘭嘅左腳勁射，又成為曼聯4月最佳入球了！呢次已經係佢近5個月以來第4次獲獎，論靚波程度確實含金量十足喎。

講開呢個每月金球獎，前多蒙特隊友、而家效力拜仁慕尼黑嘅守將曉姆斯喺上個月MK恩攞獎嗰陣，已經喺twitter提出過呢個「陰謀論」，又話定係曼聯唔會提名其他人候選……呢個預言話咁快又應驗，難怪曼聯小編都抽自己水，喺twitter回覆曉姆斯話「今次真係尷尬」（Well this is awkward）啦。