以前叫做明珠興業嘅新銀集團（988），自從上個月公布以1.6仙配售26億股新股後，股價叫做節節上升，但一直只係處於乾升局面，所以唔知配售搞唔搞得成。
新銀自從上個月公布配股以來，股價最高升上2.9仙，噚日佢亦趁大市回升抽上,升咗12.5%，收2.7仙，但成交唔夠54萬元，同當年嘅明珠比較，真係差得遠。
經紀陳話，今次新銀配售新股，配售代理以盡力方式進行，即係有可能搵唔足人認頭，𠵱家個市氣氛咁差，睇嚟真係唔容易。
家陣新銀個老闆，以前與新萬泰（433）有關連，但近期兩方面已經唔係咁多往來，所以唔能夠再以上海幫視之。此外，大廚當日主政明珠時留落嘅債務，至今仍未清得晒，下個星期新銀公布業績，睇嚟唔慌好。
講起上海幫，噚日仙股中極品之一嘅401控股（401）通過咗項交易，經紀陳話係引入上海幫嘅先兆，唔排除有上海幫成員加入董事會。
慕容小初