柏楊做唔到模範老公 - 李八方

蘋果日報 2002/07/21 00:00


六、七十年代曾經因為大力水手漫畫,喺台灣綠島坐咗差不多十年政治監嘅著名作家柏楊,繼《醜陋的中國人》之後又有新作,噚日重喺書展透過新書《中國人,活得好沒有尊嚴!》大談婚姻同家庭嘅人權。
八十二歲嘅柏楊,前年喺台灣搞咗張「人權版婚姻證書」,列出婚姻嘅八大戒條,夫妻喺山盟海誓之餘,喺屋企完全平等,重要同小朋友一齊成長。八方即時問吓坐喺台下嘅柏楊第四任太太張香華:柏楊係咪做得到呢?
點知喺文學界一樣咁出名嘅張香華一啲都唔畀面,話佢好多都做唔到啦!佢重埋怨話,有一次柏楊對囡囡講,媽媽一毫子都冇賺過,令佢當時覺得喺囡囡面前好丟臉,之後嚴正警告柏楊唔可以再咁講!
聽見太座咁勞氣,柏楊即刻出動真情呵番,佢話自己比太太大二十年,七八年佢坐完監,負上政治囚犯嘅惡名,但係太太都肯喺七九年下嫁佢,令佢到𠵱家都好感動!咁多年老夫老妻重咁溫馨,唔怪得柏楊嘅人權婚姻喺台灣咁多人追捧啦!
﹙圖﹚柏楊夫婦十分恩愛。



傳真︰2623-9278
電郵︰[email protected]