上年電視劇《粉紅女郎》喺內地大收，所以今年有關方面投資二千幾萬拍續集《搖擺女郎》，但係主角都換晒人，套劇前日喺上海開鏡，有份出席嘅演員包括曾志偉、林熙蕾、胡兵、孟廣美、葉童、王喜同王海珍等，林熙蕾做一個萬人迷嘅角色，而葉童就扮一個恨嫁嘅「結婚狂」。

年過四十扮三十歲
葉童嘅角色之前由劉若英飾演，年過四十嘅葉童喺劇中年齡只係三十歲，內地記者於是問佢扮呢個角色會唔會喺年齡上有差距，葉童顯得有啲尷尬，佢話只係做戲啫，又話自己本身就係一個「結婚狂」，否則都唔會一早就結婚喎。
葉童喺劇集入面同胡兵係一對，最後兩個重會結婚大團圓結局，內地記者自然問佢同胡兵嘅年齡差距會唔會成為演繹上嘅阻礙，一次又一次咁涉及敏感嘅年齡問題，葉童終於扯火，佢話：「你們在搞年齡歧視嗎？我拒絕回答這個問題！」講完葉童就離開記者會，留低身邊嘅林熙蕾同胡兵你眼望我眼，唔知點收科。

楊受成攜眷聽金曲
前晚DonMcLean喺會展舉行演唱會，唔少名人都攜眷睇騷，睇吓佢唱經典金曲《AmericanPie》有幾好聽，嘉賓包括楊受成同太太陸小曼、周啟生夫婦以及呂良偉同太太楊小娟等，連甚少露面嘅民歌王子區瑞強都有同太太捧場，個個都睇得好投入。