ViuTV嘅《跟住矛盾去旅行》，今晚輪到連詩雅(Shiga)同葉蘊儀去旅行，兩人去意大利，不過話由於有罷工關係，總之最後兩人同crew分開班機，只得佢兩個搭商務艙到達目的地。

Shiga期間發揮「港女本色」，check-in時都係咁篤手機，又帶埋隻minions公仔出發，話自己瞓覺一定要攬住啲嘢，種種「港女本色」，已令葉蘊儀藐爆。

再之後Shiga被蜘蛛絲纏住又好似好驚咁，葉蘊儀再一次藐爆，不過去到中段，工作人員開始問啲深入問題，例如關於敢言，掀起兩人「世代之爭」，一向講「世代之爭」都係話年青人傾向「衝動」、「敢言」，老一輩就保守咁，不過Shiga同葉蘊儀就完全相反。

Shiga被問到好多年青人上街表達訴求，有激進行為，佢就話:「係要關注嘅，但如果係激烈嘅有其他解決方法。如果你又鬧，佢又鬧咁樣，最後咪好容易變成戰爭咁樣，好唔理智，你要發表意見要深思熟慮。藝人係有一個敏感嘅position。」

之後兩人去街頭寫生，雖然係畫對方，但Shiga要上網搵葉蘊儀嘅相嚟畫，因為覺得真人郁來郁去，期間仲有遊客問Shiga啲畫點賣！

期後兩人一齊去整皮具，變咗談論名牌嘅問題，葉蘊儀覺得香港社會好難唔追求名牌，因為社會上好多廣告都鼓吹消費，但佢自己就覺得唔需要用名牌去包裝自己，Shiga就會覺得追求名牌買嘢無疑都算係一種減壓方法，自己買嘅第一個名牌袋係買俾媽咪嘅，仲話自己嗰陣日日食麵包，入行頭三年仲「窮到燶」。葉蘊儀就覺得咁樣太辛苦，同埋買嘢減壓其實可能係病態，佢話:「建立自己知識先係財富。」兩人呢段對話都有少少火藥味。

之後做另一個任務，就係去Bologna一個地方識朋友，一出車站Shiga仲好興奮咁講錯話天氣「陽光勃勃」，十分搞笑。而明明車站去目的地只需要20分鐘，但Shiga最後遲足2個鐘先去到，點解？因為佢係咁自拍影相之餘，好鍾意朱古力嘅佢見到有朱古力展，於是係咁去買朱古力食，食吓食吓，就遲咗2個鐘。

全程Shiga都係咁用「ABC港女tone」講嘢，葉蘊儀都已經藐爆，其實以前葉蘊儀以前讀藝術時，同學都係年青人，佢話:「其實我啲同學都好年青…但佢哋唔會咁樣講嘢，我自己都係好正常講嘢，其實咁樣冇問題，每個人都有自己表達方式。」咁聽落係咪話Shiga講嘢「唔正常」先！

而網民對於Shiga嘅「ABC港女tone」多數都表示反感:「連詩雅係咪唔識講廣東話？口音古古怪怪，想扮abc定點？作狀到呢⋯⋯」「好難頂呀佢把聲同佢啲口音」「陽光勃勃，夠晒頂癮」「有幾多人一路反白眼＆唞大氣一路睇連詩雅」

另外，葉蘊儀接受《蘋果》訪問，佢笑言：「係咩，咁呢個節目係講矛盾，我哋又唔熟，生活習慣唔同，當然有唔夾，加上呢個係真人騷，冇對白，證明我哋係有矛盾。」會唔會覺得Shiga係「港女」，葉蘊儀就話：「港女呢個字，我都係，香港出世嘅女仔，港唔港女我唔知，等啲觀眾自己覺得，我就冇comment。」覺唔覺得Shiga行為作狀，帶公仔出埠攬住瞓？佢稱：「拍嗰時冇乜留意，當然梗係同佢有唔夾，唔係點叫做矛盾去旅行，佢嘅行為同我唔同，我自己係佢嘅年紀時都唔會帶公仔，就算鍾意都唔會帶，可能佢要安全感、孩子氣，有啲agegroup嘅女仔都會帶公仔周圍去打卡。」

連詩雅回覆《蘋果》話：「我覺得出到嚟節目嘅效果，可能每個人有唔同想法，對我嚟講係好難忘經歷，點樣都好，對我嚟講係留下好好嘅回憶，就係咁啦。」