昨日個市跌186點，但耀科國際（143）都冇事，尾市重升1.2%，作為股壇快槍手嘅小初，亦會睇多一陣先至落車。
正當小初陰陰嘴笑，自鳴得意之際，靚女經紀打電話畀小初哭股喪，佢話隻華德豐（297）輸得好勁，噚日尾市終於忍痛全部沽晒，佢話今次被個莊家點得透，之前話會踢上批股嘅消息全部唔兌現。
華德豐噚日真係跌到破晒位，最低見過41仙，收42.5仙，跌9.6％，幾乎重返今次升浪起步點。
小初安慰靚女，叫佢算數，將噚日沽貨套現嘅錢買過第二隻股票好過。其實過農曆年時，都有人同小初發過呢隻股脾氣，小初當時已經講，隻股由30至40仙水平一條氣炒上，早上車者已經賺到笑，未必會賺到盡，如果靚女經紀當時肯走，就唔使倒輸咁淒涼。
莊家從來都係咁，明明散緊貨重叫人買貨，如果唔係佢點走？靚女，經一事長一智。