馬年球壇第一擊賀歲波，已於香港大球場曲終人散。最為香港球迷關心的，要算是年初一港聯對中國一場。由於中國隊能夠打入世界盃決賽周，有一定實力，賽前預測，即使今次中國隊以殘陣應戰，仍估計中國隊贏面較大。結局出乎意外，港聯憑射十二碼險勝中國隊，爛眼鏡跌滿地。不但賽果意外，原來在球場外，不少原本屬意捧中國隊嘅球迷，都轉軚捧港聯。由球場鬥到場外，港聯總算贏盡民心。

撰文：朱文俊　部分攝影：林柏鈞

真心改捧港聯
新年流流捱麥記都要睇波嘅，都可謂忠心fans，不過由於中國隊表現欠佳，一心捧中國隊場嘅張小姐，睇完上半場後，即時轉軚跟男友捧港聯場。
張小姐：「其實入場都係想捧中國隊，不過企係度話唔捧港聯驚俾人打！後尾睇睇吓，發覺今日中國隊有啲失準，所以決定真心捧港聯場。」
李先生：「一直都支持港聯，尤其睇好歐偉倫，點解？因為佢金色頭髮最易認。」

睇表現改主意
又係另一對一心嚟捧場嘅情侶球迷，不過佢哋對今日中國對港聯呢場賽事就頗有微言。
李小姐：「場波好悶！所以諗住走！我本身幾鍾意中國隊，不過今日表現就非常麻麻。所以未睇完上半場，就決定轉捧港聯，但係睇睇吓都係覺得唔對路，兩隊波都拖拖拉拉，同之前嗰場，洪都拉斯對斯洛文尼亞，簡直冇得揮，所以都係走人。」
吳先生：「我就一向捧港聯場，但今日兩隊波都比較『𣲷』，打得唔夠快，之前洪都拉斯嗰場好睇啲，尤其係嗰個18號仔（Ｓ馬天尼斯），好勁！相比之下呢場好悶。」

港聯狂熱分子
年初一約埋一齊入場睇波，就知感情有幾好，所以初初唔肯入鏡靚女，俾黃先生一句：「無所謂啦，過年大家開心！」就即時合作來一張合照。
黃先生：「港人用港貨，捧場捧港聯，完全睇好港隊表現，尤其捧丘建威場。我哋咁多人入場支持，香港必勝！」簡直係港聯狂熱分子。

港人捧港隊
啱啱喺加拿大返嚟的林小姐同黎先生，兩位對球賽熱情一般，反而鍾意影相，見佢哋兩個枕住部相機，你影吓我，我又影吓你，非常恩愛。連攝影師同佢哋影相，佢哋都要用佢哋部相機影先。
林小姐、黎先生：「冇乜特別話捧邊隊，因為我哋由加拿大返嚟無耐。對兩隊都唔熟悉，不過身為香港人，都係捧香港隊啦！」

矇查查入場
兩位不願透露姓名靚女，擺明入場陪跑，問佢最鍾意邊隊，好猶豫咁話：「中國隊啦……」最鍾意邊個？「18號啦。」點解年初一嚟睇波？「陪屋企人囉！」收到，難怪話最鍾意18號啦！18號都冇出場！

捧李鐵曲波
香港足球有望，一大班年輕人入場捧場，不過佢哋今日捧嘅係中國隊，就連五星旗都出埋，果然夠氣勢。
張先生：「今日最佳球員一定係李鐵，點解？我偶像嚟㗎！」

同樣係中國隊fans嘅有另一位年輕人。
溫先生：「我就捧曲波，不過冇所謂，都係中國隊！點解捧中國隊，球員平均腳法穩定，個人技術出色，加上有好嘅教練……」評得頭頭是道，可惜中國隊今場輸咗，陰功。

各有喜好
呢對拖友，證明咗情侶間係可以有唔同嘅選擇，又可以非常融洽。
陳小姐：「一心嚟捧中國隊場，特別係曲波，腳法好，偶像呀！」
熊先生：「我就支持港聯丘建威，一句講晒，香港必勝！」