每年的平安夜都比聖誕節熱鬧得多，尖東海旁、各大西餐廳，老蘭必定擠得水洩不通。與其同人逼，不如搵個地方聽聽歌、跳跳舞咪重好！預咗你會話未有任何Planning又未有節目，所以今日特別推介兩個跳舞勝地，一個可以即時WalkIn跳餐飽，另一個可預早Book定除夕去跳，各有特色，悉隨尊便。
記者：黃婉冰
攝影：林柏鈞、譚盈傑
Model：Hamony&Queen

懷舊LiveBand

唔係晨咁早買定飛又或者Book定位，想搵個地方跳舞並非易事。要跳舞唔一定要去大場，酒店都可以好好玩好好跳㗎！隱藏在富豪香港酒店地庫的WindsorArms就係其中之一。
這間以運動作主題的酒吧，由於平日多數招呼酒店住客和熟客為主，加上宣傳不多同作風低調，所以人流不算多，亦無坊間一般的大型舞場咁雜。今晚酒吧就預備咗一個倒數派對，屆時會有LiveBand助興之餘，重會有倒數，一大班人齊齊CountDown，熱鬧程度不比大場遜色。雖然酒吧位於酒店內，但消費絕不昂貴，只要付出$128（最低消費）就可以畀你癲足一晚，最大好處係隨時WalkIn都得，就算唔記得Book定位買定飛都唔使畀女朋友詐型！
為了令客人可以更盡興，酒店方面特別安排咗三位歌手輪流獻唱，歌手除了會唱出懷舊和時代曲外，各人更會以中、英、日、韓、台等多種語言演繹不同的歌曲，以照顧到不同國籍的客人；此外，酒吧還特別推出了幾款聖誕特飲，一邊飲一邊跳，百零蚊就可以癲足成晚。

醉人X'masDrinks
BrandyClassic$68

Brandy、BlueCuracao加檸檬汁，杯邊綴以砂糖，呷一口，先甜後酸，味道清新酸咪咪。但切記別飲得太快，事關酒精成份不算輕，飲過頭錯過倒數就唔好啦！

Luigi$68

驟眼睇似果汁特飲的Luigi，是Elaine的傑作之一，入口有香橙味，飲到最後，酒精開始發作，你就會知其威力殊不簡單！

ChristmasKir$68

想飲酒慶祝又想飲得與別不同，不妨試試這款用白酒和紅酒調配的ChristmasKir，酒內加入了粒粒新鮮士多啤梨同蘋果肉，酒味夾雜着淡淡的清新果香。

WindsorArms
電話：28371749
地址：銅鑼灣怡和街88號富豪香港酒店B2
時間：9:00pm至1:00am
收費：最低消費$128/位

23樓夜景鋸鋸扒跳跳舞

音樂人餐廳可以說是少有的跳舞西餐廳，對比一般的中式酒樓夜總會，這裏的環境確有其過人之處。由於餐廳開設在佐敦商廈的頂層，加上一排過的大玻璃窗，一到晚上，窗外的夜景盡入眼簾。為了令客人可以盡情起舞，老闆在數千呎的地方上間出一個大舞池，再在四周鑲滿玻璃鏡和反光玻璃，把餐廳營造出有如舞蹈室的效果，所以有不少愛好跳舞的人，都喜歡定期來這裏跳舞或練舞。
雖然餐廳今晚已預留俾客人作包場之用，但唔使失望，老闆已預備定除夕夜節目，當晚不單止有舞跳，有除夕大餐食，重有遊戲節目同表演，玩完再一班人齊齊倒數迎元旦。

香煎鱸魚柳紅花汁

除夕大餐主菜有兩款可供選擇，其中這款以鱸魚柳配上清香紅汁，鱸魚煎至外表香脆，蘸紅花汁食，魚的鮮甜味與汁香配合得宜，不太肥膩，最適合女士們。

音樂人
電話：34288898
地址：九龍柯士甸道號83號柯士甸廣場23樓全層
日期：12月31日　時間：6:00pm至12:30am
收費：除夕大餐每位$268/位（十二歲以下小童八折）