今時今日，我們生活各樣事情在乎毋須等待，快同埋快，想到與未曾想到的也一併送上。

微信平台在大陸發展完備，有時確實超乎想像。例如去到一間餐廳，只要用手機掃一掃那個枱頭的QR code，一站式「服務」由此展開，從看餐牌、點餐、加單、結帳、搖一搖攞個折扣、與友人分單夾錢、社媒分享、寫食評、以至下次叫外賣或者排隊等位，一切就在彈指之間。Waiter、Waitress的數目都慳返唔少，靠自己操控也輕鬆自在，更加唔駛舉手叫極無人應、落單又錯又漏之類。

當你去到機場，往往遇到飛機誤點，你大可以到「唱吧」流動K房（其實是一間如電話亭大小的隔音房間）唱K，用手機付款、點歌、插播，與全國幾千、以至幾萬個唱過同一首歌的人進行比賽，即時唱、即時評分KO、即時錄音、即時在手機裏接收個唱片段，可以即時上載和分享，咁好玩，真的有可能由飛機誤點玩到誤了航班，一點沒有誇張。

「快」是速度，當然必要，但單單是快卻並不足夠。「靚」是質素、質感，好睇好用，最好又有外表又有內涵。「正」是體驗、是感受，達到舒爽流麗暢順，就是感覺良好。做廣告，要做到快靚正，看似是基本要求吧，然而，單一個快很易，或單一個靚也不太難，很少齋一個正而不快不靚，所以要三者同時兼具，則一點也不易。很多客戶，要求時間要快、質素要高、價錢要平、合作過程要暢順，即最好用比之前更少的錢做到至少一樣甚或更高質的工作；而時間，上次咁急都趕到，唔係同我講今次趕唔到嘛；再揾個較有經驗的人來主理，過程自然順暢⋯⋯

計我話，快靚正三者其實是一個「感覺組合」，如果做創意，可以做到好似在購物飲食服務等過程，令人玩到盡興而樂而忘返、今次走了好想下次再來幫襯、真心鍾意咁介紹你畀親戚朋友的話，咁你就真係唔憂無客無生意。

文迪晞

掌握理財智慧 感受生活品味
investMAN, for People of Style & Substance
http://facebook.com/investMAN.hk