韓國作風 - 左丁山

蘋果日報 2005/08/12 00:00


潮流興韓風,唐英年司長嘅千金愛聽BoA,司長都話幾好聽喎。小YY自紐約報道,以前佢在美國讀大學喜歡去唐人街租TVB劇集影帶,現在就在互聯網下載韓劇或者去買韓劇DVD,喺屋企睇餐飽。
既然韓風猛吹,不如學吓韓文,肥仔K趕潮流,喺東京修讀韓語初階,覺得進度太慢,趁暑假走咗去漢城(現稱首爾)一間大學讀暑期韓文班。大學將啲學生分做六班,第六班程度最高,第一班就係初哥,乜都唔識嘅外國人。肥仔K初讀第二班,發覺閱讀能力追唔上,於是走去讀第一班,又發覺太過淺,已經識晒,又走番上第二班,點知上咗三四堂,教師就猛咁發問,肥仔K追唔上程度,答唔到,俾教師鬧到狗血淋頭,當足佢係天下第一蠢材。肥仔K唔係唯一被鬧之人,班上廿幾人,除咗五六個日本人對答如流之外,個個都俾教師省到面懵懵,兩個女生直情喺喊到一句句。一位來自南加州大學嘅黑人學生到漢城做交換生,第一次俾先生當眾大罵,覺得好委屈,對肥仔K講:「我讀書成績唔曳,都未試過咁樣俾老師痛罵嘅。啲南韓佬點解咁粗魯,冇禮貌?我𠵱家冇晒自尊心,好想輟學。」
肥仔K喺美國讀書,教師從不罵學生蠢,到日本學日文,日本教師學足美國作風,只會話學生夠醒,學得唔錯。只有在漢城學韓文,先至日日捱罵,佢向一位舊朋友韓國博士投訴,韓國人笑笑口講:「我哋啲教練出晒名夠兇惡,大牌球星喺球場上唔聽點,一樣俾教練兜巴冚,你順便學埋韓國文化啦!加油,加油!」
肥仔K話六班學生之中,佢係唯一嘅香港人,日本人最多,其中又以日本女仔佔多數,睇嚟日本人亦吹韓風。韓國可能係亞洲國家之中,最重視地位尊卑、男人要女人聽話嘅社會,肥仔K好容易同女同學埋堆,因為佢夠香港仔——斯文喎。